Efrîn

Azad Ararat

 

Çirê Efrîn ser o êrîş yeno kerdene? Çirê dewletî piştî danê dewleta tirkan ke ê zî êrîşê Efrîn kenê? Ma yê kurdî se bikerî? Dost û yarê ma se bikerê? Gelo ma senî şenê nê belayî dest ra bireyê? Û tay persanê sey nînan yenê vîrê mi de ca benê. Gelo cewabî ganî senîn bê?

Yew

No sîstemo cîhangîr di sey serrî yo ca nêdano kurdan. Nika zî winî rehet ca nêdano. Hele hetê fikrî ra eke kurdî kapîtal mebê û ronayîşa dewlete xo rê hedef mekerê, no sîstemo cîhangîr winî rehet nêverdano ke kurdî sîstemê xo ronê. Eke model newe bo, alternatîfê sîstemê cîhangîr bo, Rojhelato Mîyanên de alternatîf bo, winî rehet nêverdanê ke sîstemêko demokratîke yê şaran awan bibo. Eşkera bo, nimitkî bo êrîşî do bêrê kerdene. Ê yê êrîş kenê wayîrê wijdan û exlaq zî nîyê. Şer de wayîrê prensîbanê şer zî nîyê. Qandê cû eşkenê zilmkarîye bikerê. Her roje adiro ke rte fek ra perreno, heqîqeta nê sîstemî mojneno. O yo ke fekê rte ra qisey keno sîstem bi xo yo. Senî ke wextê rte û dewlete û îqtîdarê ci ravêrayo, wextê sîstema cîhangîr zî ravêrayo. Coka no sîstem bê şer û krîz nêşeno payan ser ra vindero.

Di

Seba ke sîstem wina yo kes neçar nîyo tehamûlê nê sîstemî bikero. Qandê cû kurdan yew sîstemêko bîne ceribna û ser kewtî. Sîstem tesîrê xo hem herêm de hem zî dinya de kerd. Vernîya şaran akerd. Rayîrê têkoşînê şaran roşn kerd. Sere de dewletanê herêm, dinya de îqtîdarî tecrûbeyê kurdan ver kewtî tersî mîyan. Şarê kurdî rewşa Başûr û sîstema ci dî, yê Rojawan zî dî. Êdî kurdî hol zanenê, sîya çik a sipî çik a û zafrengî senîn a. No het ra zanenê çi senî weçînê. Coka kurdî bîyê wayîrê hêzê leşkerî, sîyasî, dîplomatîk û yê aborî. Her çiqas her çar hetê kurdanê Rojawan de dişmenî estbê zî, yew cuya pîroze ameya raste û kurdî bi na cuyeya pîroze ya moralîze bîyê.

Hîrê

Efrîn yew cayo aram bî. Bi hezaran koçberan rê verara xo akerdbî. Efrîn seba koçberan nêşî ver berê kesî û destê xo nêakerd. Sey rte koçberî nêkerd babetê bazarî. Kurdan Efrîn de xo mîyan de yew sîstem raver berd. Coka sere de dewleta tirkê faşîst, dewletanê Rusya û Surîye Efrîn kerde hedef ke dagîr bikerê.

Çar

Nika şer o. Nika rijnayîş o. Heto bîn ra xoverdayîşêko tarîxî yeno kerdene. Kiştiş û çin kerdiş, karê dewletan o. Awankerdiş û raverberdiş karê şaran o. Peynîye senî bena? Peynîye xoverdayîş de dîyar beno. Xoverdayîş tena bi çekanê ke destê şerwanan de yê nêbeno. Xoverdayîş tena mi çalakîyanê rayîrşîyayîş û wendişê nuşteyanê kaxizan ser o nêbeno. Qandê cû seferberî ame îlan kerdene. Peynîye bi seferberîye dîyar bena. Eslê xo de peynîye nika de dîyar bîya. Avesta bi ruh û çalakîya xo peynîye dîyar kerda. Peynîya nê şerê qilêr ruhê fedayî heme cayan de mojnayîşî reyde dîyar beno. Eke fedayîyê ma estê, ê yê ke bidê ser rêça fedayî û ser bikewê zî estê.

Peynî

Ma hetê merdimîye de yê. Ê yê rast ma yê. Tarîx ma reyde yo. Dewleta tirke û şarê ci yê ke bi zehîrê faşîzmî ameyê zehîrkerdene; nêheq û zilimkar ê. Tornê Osmanîyan û yê dewleta tirke heta hewt sulaleyê xo zî nê şermî ver nêşenê serê xo wedarnê. Tornê ma do serberzî ya qala ma bikerê. Ê ma ma rê, ê tirkê faşîst zî înan rê bes o.