Sey serranê vêrênan emser zî 8ê adare Roja Cinîyanê Kedkar yeno pîroz kerdene. Pîroz kerdişê na roje tewr vêşî Kurdîstanî de bi mana beno. Çunke cinîyanê kurdan rojane bedel danê û sere nêronanê. Xo rêxistinkerdiş û têkoşînê cinîyanê kurdan, moralêko gird dano şarê kurdî, hemwext dagîrkeran zî tersneno. Hereketê Azadîye yê Kurdî hîna serranê destpêk de girîngî da azadkerdişê cinîyan. Cinîyan zî bi xoverdayîş û şerkerdişêko pêt cewab da Hereketê Azadî yê Kurdî. No babete de rola Rayber Ocalanî sereke ya. Eke o nêbîyêne cinîyê kurdan hende aver nêşîyêne. Bi averşîyayîşî zî cinîyî bîyê rayberê têkoşînî.

Cinîyanê kurdan sînorê Kurdîstanî ravêrnayo. Cinîyê kurdan cîhanî de bîyê nimûne. Qandê cû têkoşînê cinîyan bale enceno xo ser. Demokratî û azadîwazî zerrîya xo bi cinîyanê kurdan a bestenê. La dewletanê zirhêz zî tersenê ke bi paradîgmaya Rayber Ocalanî cinî newe ra bigan û biruh bibê. Coka Parîsî de Sakîna Cansiz (Sara) hedef ame girewtene û ame şehîdkerdene. Şehîdkerdiş hêz dano cinîyan. Çunke Hereketa Azadî ya Kurdî şehîdan ra hêz gêno û têkoşînî hîna vêşî aver beno. Gerîlayanê ke koyanê Kurdîstanî de yê na rastîye aşkera mojnenê.

Qet şik û guman çin o ke cinîyanê kurdan do nika ra tepîya zî rayberîya têkoşînê cinîyan bikerê. Her ke cinîyanê kurdan xo aver vist do komelê kurdan bivurnê û aver biberê. Her ke komelê kurdan aver şi, do cinîyanê kurdan bi şarê kurdî ya reyberîya têkoşînê cinîyan û şaran hem Rojhelato Mîyanên de hem zî cîhan de bikerê.

Wa heştê adare Roja Cinîyanê Kedkar Rayber Apo û şehîdan rê pîroz bo. Wa heme gerîlayan, têkoşeran û cinîyanê kedkaran rê pîroz bo.

Cinî Cuye Azadîye!

Wa biciwîyo 8ê adare!

Wa Biciwîyo Rayber Abdullah Ocalan!